- På veldig kort sikt er utfordringa å skaffe pengar til dei palestinske sjølvstyremyndigheitene. Dersom ikkje dette skjer om nokre få veker, vil heile prosessen kunne kollapse, seier Eide (Ap) til NTB.

Måndag møtte utanriksministeren palestinarane og fleire arabiske toppleiarar for å diskutere situasjonen og korleis arbeidet med å opprette ein eigen palestinsk stat kan fortsette.

- Alle i rommet var einige om at det no hastar med å få ei vidare utvikling på dette og at tostatsløysinga no er inne i ein absolutt kritisk fase, fortel Eide.

Søndag var det også givarlandsmøte for palestinarane der pengar til vidare utvikling var tema. Pengar er nettopp det utanriksministeren meiner det hastar mest med for at ikkje heile prosessen skal kollapse om kort tid.

- I USA jobbast det blant anna hardt med å få ut ein stor sum til dette arbeidet, men det stagnerer i Kongressen på grunn av valkampen.

- Eg oppfordra også alle landa som var her, til å betale det dei har lovd så raskt som mogleg.

Eide meiner den lange prosessen med å opprette eit eige og sjølvstendig Palestina er godt i gang, sjølv om utfordringane er mange og store.

- Vi er både nærmare og lengre unna å få til ein palestinsk stat no enn nokon gong tidlegare. Infrastrukturen i form av politi og sikkerheitsstyrkar er på plass, og samarbeidet mellom Israel og Palestina på dette området er godt. Det er også demokratiske institusjonar på plass, som er langt føre mange andre land i regionen, meiner utanriksministeren.

- På den andre sida er det ei utvikling på bakken, der palestinsk område stadig vekk krympar som følgje av utbyggingar av israelske busetjingar. Det gjer at mykje blir veldig vanskeleg og at ein til dømes må køyre varer i mange mil for transport mellom to byar som er berre kilometer unna kvarandre.

- Lyspunktet er at israelarane no har begynt å betale mykje pengar som dei skuldar Palestina, og det er eit viktig steg i rett retning, legg han til.

Eide meiner også at opprettinga av ein palestinsk stat kan vere løysinga på valden og uroa i den arabiske verda, som begynte med opprørarane i Egypt, Libya og Tunisia i 2010 og som utløyste borgarkrigen i Syria.

- Det å få til ei løysing i Palestina er viktigare enn nokon gong. Går det bra, kan dette vere ein modell for demokratiske krefter i andre arabiske land. Eg trur Palestina vil kunne bli vellykka og demokratisk og dermed sende sterke signal til regionen, seier utanriksministeren.

- Derfor er det også krise om dette kollapsar. Det vil kunne styrke kreftene eg ikkje håpar vil dominere den arabiske våren og føre til nær sagt ein arabisk vinter med ei utvikling vi absolutt ikkje ønskjer. (©NPK)