- Muslimar, spreng ambassadane, drep amerikanarane, ropte rasande islamistar i Libanon.

- Muslimar, grip til våpen og hjelp profeten! Drep Obama! Drep amerikanarane! ropte demonstrantane.

Også i fleire andre land kom demonstrasjonen ut av kontroll. Hardast gjekk det for seg i Sudan, Libanon og Tunisia.

Dei veldige protestane mot USAs interesser fekk fredag kveld president Barack Obama til å varsle ein omfattande gjennomgang av tryggleiken ved amerikanske utanriksstasjonar over heile verda.

Utanriksdepartementet i Oslo ber nordmenn som oppheld seg i dei berørte landa, om å unngå store folkemengder.

Demonstrantar tok seg inn på området til USAs ambassade i Tunisia der det like etterpå braut ut ein veldig brann. Tre menneske vart drepne og 28 såra. Ifølgje augevitne skaut politiet mot folkemengda.

Demonstrantar sette også fyr på ein amerikansk skule i hovudstaden Tunis, opplyste nyheitsbyrået Reuters. Skulen ligg like ved ambassaden og var stengt då brannen starta.

Omtrent samtidig mista minst to personar livet under ein veldig demonstrasjon ved USAs ambassade i Sudan. Den eine demonstranten vart påkøyrd av ein politibil, medan den andre vart funnen død inntil muren som omringar ambassaden, ifølgje AFP.

Fleire demonstrantar greidde å ta seg inn på ambassadeområdet, der vaktar skaut varselskot for å skremme dei bort. Like før var også Tysklands ambassade blitt storma.

Også i Egypt har det i fleire dagar vore svært uroleg. Men fredagen vart rolegare enn frykta då Det muslimske brorskap trekte oppfordringa si til landsomfattande demonstrasjonar mot USA.

Filmen «Innocence of Muslims» gjer narr av profeten Muhammed, noko som har sett sinna i kok i heile regionen. Filmen vart for alvor kjent i muslimske land denne veka, og tysdag kveld vart USAs ambassadør i Libya og tre andre amerikanarar drepne i eit veldig angrep mot det amerikanske konsulatet i Benghazi.

USAs president Barack Obama skulle fredag kveld vere til stades på Andrews Air Force Base då leivningane etter dei fire kom tilbake til USA.

Det kvite hus varslar samtidig at tryggleiken ved alle amerikanske utanriksstasjonar skal gjennomgåast. USA har allereie sendt elitegrupper med 50 marinesoldatar til Libya og Jemen for å trygge interessene sine.

Det var fredag kveld ikkje komme meldingar om angrep mot norske ambassadar og konsulat, og ingen av dei var heller evakuert. Utanriksdepartementet kom likevel med ei åtvaring til nordmenn i utlandet.

- Situasjonen vil nok arte seg ulikt dei forskjellige stadene, men det er klart det vil vere fornuftig å halde seg borte frå store, urolege folkegrupper, seier kommunikasjonsrådgivar Kjetil Elsebutangen til NTB.

Den norske ambassaden i Kairo ber nordmenn halde seg unna Tahrir-plassen i sentrum av Egypts hovudstad og gatene rundt.

- Det er meldt om tilfelle av grov trakassering og seksuelle overgrep mot kvinner i området, skriv ambassaden. (©NPK)