- Vi vil sjå på denne saka torsdag og vurdere om det framleis er grunn til å bekymre oss for den marknadsmakta Schibsted no vil få, seier konkurransedirektør Christine Meyer til NTB.

Tilsynet har tidlegare arbeidd mykje med prosjektet som først heitte Media Norge og også omfatta Adresseavisen, men som no heiter Schibsted Norge og omfattar VG. I tillegg er Adresseavisen med i annonsesamarbeidet. Og på toppen av det heile er Schibsted eineeigar av Finn.no som er Noregs heilt dominerande portal for rubrikkannonsar.

I praksis betyr dette at Schibsted blir heilt dominerande i marknaden for avisannonsar. Då Konkurransetilsynet opphavleg opna for Media Norge, måtte Schibsted forplikte seg til å opne alle trykkjeria sine for andre fordi tilsynet meinte Schibsted fekk heilt dominerande marknadsmakt både på produksjon og distribusjon av tradisjonelle papiraviser.

No handlar det både om annonsar på papir og nett, ei vurdering Konkurransetilsynet så langt ikkje har gjort. (©NPK)