- Det er ingen grunn til å leggje opp, seier supertungvektaren til TV-kanalen ARD.

Han var tittelforsvarar i den tyngste klassen, men det gjekk gale i det andre forsøket hans i rykk tysdag. Han hadde eit godkjent lyft på 192 kilo, men med fire kilo ekstra på stonga mista han grepet og tok imot med nakken.

Stonga bøygde seg, og Steiner fall til bakken under ho.

Etter nokre skrekksekund i vektlyftarhallen reiste han seg og greidde å gå ut sjølv for å få legebehandling.

- Det går bra med meg, men natta var smertefull. Smertene er verre enn diagnosen, sa Steiner onsdag.

Legane påviste ein bandskade i halsen, ein støytskade i brystbeinet og ein muskelskade i det same området.

Steiner hadde fleire skadar som sette han tilbake i oppkøyringa til OL, men han håpa likevel på medalje.

- Eg er ikkje skuffa, for eg sit her sunn og frisk. Eg har kone og barn heime, så det finst viktigare ting, sa han. (©NPK)