Island burde avgjort i ordinær tid, men 15 sekund før slutt missa Snorri Gudjonsson på straffe på stillinga 27- 26. Etter det kontra ungararane inn ei utlikning to sekund før slutt.

Island kom til kampen som storfavoritt etter å ha vunne alle dei fem gruppekampane sine og teke ein overlegen gruppesiger. Ungarn sleit seg så vidt til cupspelet ved å sigre over EM-toar Serbia i den siste kampen.

Storspel av Ungarns keeper Nandor Fazekas gav islendingane problem, og høgrekanten Gergely Harsanyi sette inn fem mål i første omgang. Dermed gjekk Ungarn til pause med leiinga 16- 12.

Fem mål på fem minutt tidleg i andre omgang fekk Island à jour. Ungarn kjempa seg til ei ny tremålsleiing, men Hreidar Gudmundsson kom inn i Islands mål og «gjorde ein Grimsbø». Storspelet hans bidrog at Island kunne ta leiinga 27- 26.

Så kom strafferedninga til Fazekas og den desperate kontringa som enda med scoring av Mate Lekai to sekund før slutt.

- Hellet var på vår side, men vi har ein god keeper som er i stand til å redde straffer, sa Barcelona-kaptein Nagy. Saman med Fazekas var den 209 centimeter høge nimålsscoraren hovudmann bak sigeren.

Dramaet heldt fram i ekstraomgangane. Etter dei to første stod det 30-30, men Ungarn viste seg å orke mest då klokka nærma seg 80 minutt. Med 34- 33 var det ungararane som kunne juble over semifinaleplass. Island greier korkje å kopiere eller forbetre sølvet frå Beijing.

- Vi er alle ute av oss. Vi ville så gjerne gjenta prestasjonen frå Beijing. No får andre leie laget vidare, sa den avtroppande trenaren, Gudmundur Gudmundsson. (©NPK)