- Eg kunngjer i dag at eg hoppar av frå draps- og terroristregimet, og eg kunngjer at eg sluttar meg til revolusjonen for fridom og verdig framferd. Eg kunngjer at eg frå i dag av er revolusjonssoldat, seier Riyad Hijab gjennom ein pressetalsmann.

Ifølgje talsmannen er Hijab på ein sikker stad. Ein jordansk tenestemann seier til nyheitsbyrået Reuters at Hijab har rømt til Jordan saman med familien sin.

Den syriske opposisjonen hevdar avgangen til statsministeren viser at regimet til president Bashar al-Assad er i ferd med å gå i oppløysing.

Syrisk statsfjernsyn melder på si side at Riyad Hijab er sett av som statsminister og at visestatsminister Omar Ghalawanji er utnemnd til å leie ei ny interimsregjering i Syria.

Hijab har vore ein leiande sunnimuslim i det syriske regimet, som er dominert av alawittar. Han er den høgstrangerte politiske leiaren som har hoppa av til no. Hijab overtok som statsminister i juni etter valet til nasjonalforsamling månaden i forvegen og er 46 år gammal.

Ifølgje den arabiske nyheitskanalen Al Jazeera har også tre andre ministrar hoppa av. (©NPK)