Miami Heat hadde kniven på strupen før kampen i Boston torsdag. Eit tap ville senda stjernemannskapet frå Florida ut av sluttspelet, men leidd av «King James» vann Heat 98- 79 og utlikna til 3- 3 samanlagt.
Dermed vil kampen i Miami laurdag avgjere kven som skal møta Oklahoma City Thunder i NBA-finalen.
- Vi måtte vinna denne kampen. Det var ein god siger for oss. No står det att éin kamp, og han er i bygningen vår. Vi ser fram til utfordringa, sa James.
Celtics-forsvaret hadde lite å stilla opp med mot James. Med 45 poeng og 15 returar var han den store spelaren i kampen. Lagkameraten Dwyane Wade meinte James aldri har spelt ein betre kamp for Miami Heat.
- Han spelte strålande. Nokre av skota han trefte på var utrulege. Det var ei MVP-førestelling. Vi gav han ballen og kom oss unna, sa Wade.
James blei kåra til den mest verdfulle spelaren (MVP) i grunnspelet.
Han kom til Miami Heat før sesongen i fjor. Då tok laget seg til finale, men der blei det tap for Dallas Mavericks. (©NPK)
