18-åringen frå Nøtterøy vitna i retten måndag formiddag. Ho blei sjølv skoten i hovudet og blei liggjande lenge i mengda av drepne ungdommar. I ettertid har ho slite med hovudplager og ein skade i foten.
- Dansing, som eg er veldig glad i, er derfor veldig uaktuelt no. Eg har også opplevd flimring i synet og øyresus, men tatt i betraktning kor nær eg var å døy, synest eg ikkje at eg har noko å klage på. Eg har ti menneske å leve for - eg må halde fram med å leve, forklarte Smith på spørsmål frå aktor Svein Holden om korleis ho har hatt det i ettertid.
Utsegna utløyste gråt hos fleire av tilhøyrarane i rettssal 250, og også administrator for retten, Wenche Arntzen, blei tydeleg prega. Mange av dei etterlatne etter dei drepne på Kjærlighetsstien følgde Smiths forklaring måndag.
Utøya-leiren skulle bli det første steget inn i eit politisk liv for Marte og bestevenninna Maria Maagerø Johannesen. Dei to heldt kvarandre i hendene då dei prøvde å spele døde på Kjærlighetsstien. 18-åringen forklarte i retten at ho merka veldig godt at Maria blei drepen, sjølv om ho ikkje såg det.
- Sommarleiren skulle gjere at vi blei kjende med folk og turte å bli med på andre AUF-arrangement. No er eg engasjert for to, både for meg sjølv og Maria, sa Marte Fevang Smith i retten måndag. (©NPK)
