Det er bladet Bistandsaktuelt som har kartlagt omfanget av norsk bistand dei siste 50 åra. Totalsummen er komen opp i 516 milliardar kroner, noko som svarar til eit halvt statsbudsjett, skriv Vårt Land.

- Bistandspengane har gjort Noreg til ein viktigare aktør i internasjonal politikk, skaffa oss allierte og vore ein døropnar for norsk næringsliv, seier Østerud, som er professor ved Universitetet i Oslo.

Seniorforskar Gunnar M. Sørbø ved Chr. Michelsens Institutt er ueinig i at norsk næringsliv har hatt stor nytte av den norske bistanden.

- Mange land - inklusive naboland som Danmark - har vore langt meir kyniske og ivrige på å planta flagga sine og sikra kontraktar til eige næringsliv som motyting for bistand, meiner Sørbø.

Han er likevel einig i at ryktet til Noreg som ei humanitær fredsmakt, og som eit rikt land utan stormaktsinteresser, kan ha hjelpt Noreg til å få ei sterkare stemme internasjonalt.

- Den humanitære innsatsen vår kan ha bidrege til å opna dører, seier han.

Tanzania toppar lista over dei 158 landa som har fått norske bistandsmidlar. Landet har fått 25 milliardar kroner (inflasjonsjustert til 2011-kroner) frå Noreg. Deretter følgjer Mosambik med 15,1 milliardar og Zambia med 12,3 milliardar bistandskroner. (©NPK)