Rettssaka og dommen mot den tidlegare politisjefen Göran Lindberg har vakt oppsikt i Sverige på grunn av brutaliteten i tiltalen. Fredag dømte Södertörns tingsrett i Stockholm 64-åringen for ei rekke seksualiserte overgrep.
I den grovaste valdtekta Lindberg er dømt for, batt han ei 17 år gammal jente fast og valdtok henne på ein måte tingretten skildrar som sadistisk. Ifølgje retten viste Lindberg «særskilt omsynsløyse og råskap».
Lindberg, som både har vore politisjef i Uppsala og rektor for den svenske politihøgskulen, blei blant anna dømt for mishandling, valdtekt, grov valdtekt, sexkjøp og hallikverksemd.
Han må også betale offera sine til saman 300.000 svenske kroner i erstatning og rundt 700.000 kroner i sakskostnader. Advokat Elisabeth Massi Fritz representerer to av offera. Ho meiner dommen er for mild.
Göran Lindberg var éin av Sveriges mest kjente politisjefar og var ein profilert og hyppig brukt førelesar. Han heldt blant anna foredrag om likestilling, respekt, seksuell trakassering og mobbing, og han vektla særleg betydninga av moral og etikk. (©NPK)
