Tidleg onsdag ettermiddag møtte den siste kua sin ende ved Nortura Namsos. Etter dette året står 17 slakteri igjen, og sju av dei går også ei usikker framtid i møte, skriv Nationen.
Konsernet er i gang med ei styrking av organisasjonen, som inneber store kutt og effektivisering, for å gjere seg meir konkurransedyktige. Både omsetninga og overskotet har auka i år, samanlikna med 2009, men også i perioden januar-april i år gjekk Nortura 48 millionar kroner i minus.
- Det er viktig å få ned kostnadene mest mogleg og raskast mogleg, også med tanke på at internasjonal konkurranse bankar på døra. Sterk konkurranse i butikkane er også inspirerande for eit merkevarehus som Nortura, seier Sveinung Svebestad, styreleiar i Nortura.
Konsernet Nortura vart danna i 2006 då samvirkeføretaka Gilde Norsk kjøtt og Prior Norge slo seg saman. I 2001 hadde dei to til saman 41 slakteri. I 2011 skal talet ned i 17. Eit storslakteri skal ta over for dei små slakteria i kommunane. Storslakteriet skal liggje i Malvik i Sør-Trøndelag og er på heile 20.000 kvadratmeter.
Også andre deler av landbruket må effektivisere som følgje av stor konkurranse. Tine Har sidan 1990 lagt ned 70 meieri. (©NPK)
