Tidlegare etiopiske opprørsleiarar seier til den britiske rikskringkastinga at dei lurte hjelpeorganisasjonane for å skaffe seg pengar til våpen og kampen mot den sitjande regjeringa.
Éin av opprørsleiarane, Aregawi Berhe, som var kommandant i Tigray People's Liberation Front (TPLF), anslår at over 560 millionar kroner vart tappa frå naudhjelpa. Det ramma blant anna pengane som vart samla inn av Band Aid-prosjektet til Bob Geldof.
Svoltkatastrofen kosta omkring ein million menneske livet i 1984-85 og førte til ein storstilt internasjonal hjelpeaksjon. Mange av pengane frå regjeringar og innsamlingsaksjonar gjekk til dei svoltramma, men altså ikkje alt. (©NPK)
