Paddene i Austefjorden er medievande, sjølv om dei kanskje ikkje alltid er så fotogene. No får dei 30 minutt i beste sendetid på NRK.

Livet som padde i Austefjorden er glamorøst. Ikkje berre har dei fått eigne tunnelar som sikrar dei ei trygg passasje under den nye framtidige Europavegen. No får dei også 30 minutt i beste sendetid på NRK.

- Det er spesielt at det som truleg er Europa sin største paddebestand held til inst i ein fjord på Sunnmøre. Det lokale engasjementet er også spesielt, seier produsent og regissør Are Pilskog i filmselskapet Blåst Film AS frå Leikong.
- Eg har vore med og filma sidan dei starta med å lage til dei nye paddetunnelane, og så skal eg filme no når alt er ferdig for å sjå korleis det har gått med paddene, fortel han.

Kunsten å legge seg paddeflat
Naturfilmen har fått tittelen "Kunsten å legge seg paddeflat". Paddene er som kjent ikkje dei raskaste amfibia, då dei kan bruke opp til ein time på å krype ein liten meter. Dette har kosta mange paddeliv når dei har kryssa vegar i Austefjorden. Paddeentusiastane Oddvar Olsen og Gunnar Wangen har bært bøttevis av padder over vegen for å redde dei frå bildekka. No er paddetunnelane på plass.
- Det var Oddvar Olsen som fortalte meg om paddene og tunnelane, og at dei har telt padder i mange år. Dei har fortalt at dei i løpet av éi natt telte 5.001 padder, ler Pilskog.
- Oddvar Olsen og Gunnar Wangen har stått på for å ta vare på dette unike. Dei er også med i filmen. I tillegg er det lokale krefter i Austefjorden som jobbar for å bygge opp ein identitet rundt dette med paddene. Det er eit spesielt fenomen, seier Pilskog, som tydeleg er fascinert over engasjementet.

Fotogene padder
Tysdag 21. august skal formannskapet i Volda handsame søknad om pengestøtte til filmen. Administrasjonen rår til at kommunen løyver 50.000 kroner.
- Filmen vil vise Austefjorden på sitt beste, og vil kunne vere ein viktig kanal for å få naturinteresserte og reiseglade menneske til å kome til Volda. Paddefenomenet i Austefjorden er unikt i Europa. Eg har tru på at filmen om paddene vil kunne marknadsføre Volda kommune, samstundes som at prosjektet vil gje synergiar for lokale firma, seier rådmann Rune Sjurgard.
No skal altså dei vortete, ruglete amfibiane, spekka med giftkjertlar, selje Austefjorden.
- Folk bryr seg mykje om svære kvalar og søte ting. Det skaper engasjement. Her har vi tatt tak i paddene. Dei er fotogene på sin måte. Dette, saman med det lokale engasjementet, samt at det er brukt mykje pengar på å lage tunnelar, gjer alt veldig spesielt, seier Pilskog.
Filmen er planlagt vist på NRK rundt juletider neste år.