* Ut av Kvivstunnelen mot Grodås, april 2012. Opninga av den nye samferdselsåra mellom Sunnmøre og Sogn og Fjordane skjer 22. september.
Grunna rassikringa i Hjartåberget vert ikkje Kvivsvegen ein del av E39
før hausten 2013. Dette kjem fram i eit brev Statens vegvesen har skrive
til Eid kommune.
Det er avisa Fjordabladet som skriv dette. I brevet heiter det at
Stigedalen skal vere E39 fram til arbeidet i Hjartåberget er ferdig, og
at ferjesambandet Volda-Folkestad heller ikkje vert overført frå staten
til Møre og Romsdal fylkeskommune før denne rassikringa er realisert.
Når Stigedalen vert fylkesveg hausten 2013 er det opp til Sogn og
Fjordane fylkeskommune og Møre og Romsdal fylkeskommune å bestemme
standard på vegen, og kva slags drift og vedlikehald den skal få.
Ikkje ny status
Vidare skriv Fjordabladet at det i brevet til Eid kommune vert
kommentert spørsmålet om Stigedalsvegen skal få ny status som
Interregional sambindingsveg med riksvegstatus. Statens vegvesen
understrekar her at veglova opererer med riksveg og fylkesveg, og at
ønsket om å innføre ein ny vegstandard er noko som må gjerast gjennom
politisk arbeid og lovendring.
