Fredag ettermiddag var det lange køer ved ferjekaia i Volda. Dette etter at Austefjordvegen stengde natt til torsdag.

Sjå video frå køa

- Vi har merka at vegen er stengd ja. Trafikken er merkbart større både morgon og ettermiddag, stadfestar Trond Nesset ombord i MF Folkestad. Han held fram at tidlegare har det vore god plass på morgonavgangane, men dei siste dagane har ferjene i tidsrommet 07.00-08.00 vore temmeleg fulle.

Ikkje ekstraferje
Sidan fylket ikkje har sett av midlar til ekstra ferjekapasitet over Voldsfjorden, er det einaste tiltaket for å lette trafikkavviklinga manuell dirigering frå Nortrax sine folk. Desse tek seg hovudsakleg av trafikkdirigering om ettermiddagane, då det er størst press på ferjekapasiteten.
- Trafikken byrjar å bygge seg opp i tretida, og når klokka bikkar fire tek det laust for alvor, forklarer Nesset. Dagens situasjon minner om då Austefjordvegen vart stengd av ras i oktober/november 2011; også den gongen var det stor trafikk over ferjesambandet. Dette har gitt ferjeselskapet verdfull erfaring til å takle slike utfordringar, men no i starten av sommaren må ein belage seg på turistar i tillegg til fastbuande.
- Mitt råd er at folk køyrer saman dersom dei kan. Då vert det færre bilar å dirigere, og betre plass på ferja, seier Nesset. Austefjordvegen vert stengd fram til 12. juli.