* Om Ulvestad skule vert lagt ned, vil flesteparten av foreldra på Lauvstad sende borna sine til Dalsfjord skule. (arkivfoto)

Sjølv om det ikkje kan ha vore lett, kjem foreldre på Lauvstad med ei svært viktig avklaring i skulestriden i krinsen. Dei tek 15 av elevane på Ulvestad over til nyeskulen litt lenger inne.

Dermed er grunnlaget vekke for å starte privatskule på Ulvestad. Utspelet som kom no, gjer også at politikarane vert nøydde til å seie klarare frå om kva skulestrukturen skal vere.

Lang og vanskeleg sak
Det har lenge vore klart at det er slett ikkje alle foreldre med elevar på Ulvestad skule  som kan tenkje seg å vere med på ei privatskuleetablering der i staden for å samle alle elevane i krinsen på nyeskulen på Dravlaus. Og no har foreldre til 15 born i Ulvestadbygda skulekrins informert skulekontoret om kva dei meiner som er best for borna. Informasjonen gir også politikarane høve til å kome med klarare signal om skulestruktur i området enn dei har klart til no.
Det foreldra med Guro K. G. Grønbech og Per Erling Parr Sætre som talspersonar  poengterer, er at saka kring skulestrukturen har vore både lang og vanskeleg, og at den har tæra på menneska og relasjonar i bygdene det gjeld. Dei håper no på ei god og endeleg løysing til beste for borna snarast råd.

Vil styrke fellesskapet
Og så poengterer dei i skrivet til kommunen at dei ønskjer fred og forsoning i saka, og at dei no vil vidare i arbeid til beste for bygda og fjorden.
- Me set pris på det offentlege skuletilbodet som Ulvestad skule gjev. Slik situasjonen og barnetala i Ulvestadbygda og resten av vestsida av fjorden no har vorte, ser me det som best at borna frå vestsida av Dalsfjorden vert samla i felles klassekull. Dette for å få eit så godt fagleg og sosialt tilbod som råd er, og for ein framtidsretta bygdestruktur, skriv dei.
Det dei vidare peikar på er at når det ikkje vart vedteke å samle 1. til 4. klasse på Ulvestad, og 5. til 10. klasse på Dalsfjord skule, så ser dei på full samlokalisering som beste løysinga. Dei meiner dette vil styrke det offentlege skuletilbodet i området, samle fagleg kompetanse og der er tilgang til symjebasseng Difor er meldinga deira at skulle Ulvestad skule bli lagt ned, så vil dei nytte seg av det næraste offentlege skuletilbodet som vert Dalsfjord.

Ønskjer barnehagen på Ulvestad
Det dei  ikkje ønskjer endring av er SFO-tilbodet på Ulvestad. Dette fungerer godt for alle, så dette ønskjer dei å oppretthalde. Det same gjer dei for barnehagen der. Dei grunngir dette med at det er frå Lauvstad dei har ferjesamband til Volda. Og dei meiner at den gode logistikken dette gir for levering og henting av borna er viktig dersom ein ønskjer å legge til rette for tilflytting.
Korleis dei vil ha organisert SFO-tilbodet her samtidig som dei ønskjer at skuletilbodet skal vere på Dalsfjord, skriv dei ikkje meir om.
Det dei konkluderer med, er at tidene endrar seg, og at dei ønskjer å sjå framover og at dei har tru på framtida til bygdene på vestsida av Dalsfjorden. Det dei først og fremst vil er å ha fokus på borna si positive utvikling.
- Eit godt skuletilbod er viktig for innbyggjarar og tilflyttarar. Å stå saman og samarbeide vil gjere bygdene sterke, levande og meir attraktive for innbyggjarar og eventuelle etablerarar, meiner dei.

På linje med det som har vore tilrådinga
På skulekontoret ser dei på innspelet som ei viktig avklaring.  Per Ivar Kongsvik på skulekontoret merkar seg at noko uttalen stadfestar, er at det ikkje er eintydig  kva dei føresette meiner vil gje det beste skuletilbodet for elevane som i dag går ved Ulvestad skule.
Elles tek han til vitande at foreldre til så mange som 15 elevar i og under skulepliktig alder er på line med administrasjonen når ein ser ei samlokalisering som det beste sosiale, faglege og mest framtidsretta alternativet. Sett i lys av at det neste skuleår vil vere 21 elevar ved Ulvestad skule, er dette ein stor del av elevgrunnlaget, minner Kongsvik om.