NØGDE: Arild Bakke og Turid Mork Bakke er nøgde med hagen som dei har brukt sju år på å få i stand.
Torsdag inviterte Ørsta hagelag til hagevandring i hagen til Arild Bakke og Turid Mork Bakke på Mork.
Ekteparet
Bakke sit på verandaen i den strålande sola og ventar på dei
nysgjerrige besøkjande. Rundt heile huset bognar det av blomar og
buskar. Ei lita, konstruert elv klukkar muntert. I bakken nedom huset
har dei mura opp stiar og platå innimellom alle dei grøne og fargerike
plantane. Ekteparet er samde om ein ting, det gir ro i sjela å vere i
hagen.
Sjuårig prosjekt
Familien Bakke flytta inn i
huset på Mork i jula 2004. Dei byrja med hageprosjektet allereie den
fyrste sommaren og har hatt mykje glede av det. Arild har mura og Turid
har planta.
– Vi hadde aldri nokon plan, hagen vart til medan vi
dreiv på. Den einaste planen vi har hatt er å verte ferdig ein dag,
fortel Arild.
Sju år etter er dei endeleg nøgde og berre vedlikehald
står igjen. Hagen består i hovudtrekk av rododendron, vintergrønt og
roser. I hagen og i dei to drivhusa deira finn du òg aprikos, fersken,
kiwi, tomat, morellar, pærer, eple, plommer, bringebær, jordbær, solbær
og rips.
– Vi lagde hermetiserte fersken i fjor, og det er noko av
den beste desserten eg har smakt. Noko heilt anna enn dei du kjøper,
smiler Turid.
Ho fortel at ei hageinteressert mor i nabohuset er til stor hjelp med både drivhusa og hagen.
Rododendronmani
Rododendron
er den største lidenskapen til Turid, noko som viser att i hagen. Her
er over 300 planter, og rundt 100 forskjellige rododendronsortar. Dei
eldste vart planta for 7 år sida, då dei flytta inn.
– Eg synest dei var fine, og fekk litt samlemani, seier Turid.
Ho
fortel at det ikkje er så mykje arbeid med dei sidan dei ordnar seg
mykje sjølv. Dessutan blomstrar rododendronen no, og rosene seinare i
sommar, slik at det er farge i hagen heile sommaren. For å halde
rododendronen nøgde gjødslar ho dei to gongar i året, tidleg på våren og
tidleg på sommaren. Dei vil òg ha sur jord, som du kan finne i skogen.
Barnåler og liknande er fint å bruke i bedet.
– Det er himmel på jord
å vere i hagen. Det er spanande å sjå om plantane veks seg til og om
ein får dei til, avsluttar Turid før ho slår seg ned på verandaen med
mannen og blomsterentusiastane for ein kaffikopp.
