* John Arne Winsnes. (arkivfoto)
Adm Banksjef John Arne Winsnes forlet SpareBank 1 Søre Sunnmøre
og blir viseadm i Olympic Shipping AS i Fosnavåg. Han fråtrer 30.
oktober etter 3,5 år i stillinga.
- Eg har hatt ei flott tid
som leiar for SpareBank 1 Søre Sunnmøre. I lag med dyktige medarbeidarar
har vi gjort viktige framsteg i ei næring med store omstillingar. No
har Stig Remøy utfordra meg med ei sentral rolle i Olympic Shipping. Eg
ser fram til å ta fatt på oppgåva i truleg det mest spanande reiarlaget
på Sunnmøre, seier Winsnes i ei pressemelding.
Gode resultat
Styreleiar Oddvar Strand i SpareBank 1 Søre
Sunnmøre vil på vegner av styret takke John Arne for hans innsats. Under
hans leiing har banken på desse åra levert gode resultat, betra
soliditeten og gjort framtidsretta grep som styrkjer banken som føretak
og merkevare. Styret er i gang med å rekruttere ny leiar, og er
optimistisk i samband med å rekruttere ny toppsjef til denne sentrale
rolla på Søre Sunnmøre.
Stig Remøy, hovudaksjonær og CEO i Olympic
Shipping, er nøgd med å få John Arne om bord. Hans internasjonale
erfaring, den industrielle og finansielle bakgrunnen hans frå
multinasjonale selskap, samt leiarerfaring frå lokal verksemd er viktig
for Olympic Shipping si satsing.
Om verksemdene
SpareBank 1 Søre Sunnmøre har ein
forvaltningskapital på om lag åtte milliardar og 75 tilsette, og er ei
aktiv og synleg drivkraft for utvikling av regionen Søre Sunnmøre
Olympic
Shipping er eit av dei leiande offshorereiarlaga på Sunnmøre med 22
fartøy innan offshore og fiskeri, inkludert nybygg. Med sjø- og
landbaserte aktivitetar har reiarlaget om lag 800 tilsette i Noreg, Sør
Amerika og Asia.
