Klare for Volda: Irmelin Uttisrud og Stine Dybdahl.
Nye hordar av studentar har i desse tider
funne vegen til Volda. Tysdag var det opning av det nye skuleåret på Berte
Kanutte-huset, og det med koret Team Simone som musikalsk trekkplaster. Her
skorta det ikkje på glade fjes som vonefullt ser fram til å gå i gang med
studietida si ved Høgskulen.
På Berte Kanutte-huset var det
denne veka offisiell opning av skuleåret 2010/2011. Det var i år som kvart år
både prominente talarar og artistar på podiet. Team Simone, koret frå Volda som
vart allemannseige då dei var med i fjernsynsserien ”Det store korslaget”, stod
for det musikalske innslaget. Sjølve korleiaren frå den serien, den landskjende
vokalisten og tidlegare Volda-innbyggjaren Simone Larsen, kunne diverre ikkje
vere til stades. Men koret beviste at dei har musikalske musklar til å stå på
eigne bein, og fylte Berte Kanutte-huset med song frå sine klokkeklare røyster.
Forventningar
Irmelin Uttisrud og Stine
Dybdahl skal byrje på høvesvis Drama og Sosionom-studier i haust. Dei
samtykkjer i at det generelt gode sosiale miljøet i Volda gjorde at dei flytta
hit for å studere.
- Eg valde Volda fordi eg hadde høyrt mykje positivt om staden av venar og kjente, seier Stine. Ho ser fram til å treffe mange nye menneske og bli kjent med dei. Det kan venninna som sit ved sidan av vere einig i.
- Den sosiale biten var hovudårsaka til at eg flytta til Volda, fortel Irmelin. At Volda er ein liten stad ser dei ikkje på som noko problem. Om dei skulle ynskje avveksling av det litt meir urbane slaget, er ikkje Ålesund så langt unna, meiner dei.
