Regissør Beate Grimsrud fekk æra av å
klippe snora då Dokumentarfilmfestivalen vart offisielt opna i Volda
torsdag. Grimsrud står bak filmen ”Det pleier å gå bra” som vart vist under
opninga. Snorhaldarane var festivalsjef Jon Tonning og produsent Helga Fjordholm.
Festivalen er nummer 14 i rekka, og festivalsjef Jon Tonning lovar publikum både workshops, konsertar og fest i tillegg til dei heile 90 filmane som skal visast i løpet av dei neste fire dagane.
- Det gjer ingenting at veret er litt dårleg, for då fins det nemleg inga unnskyldning for å ikkje kome og sjå film, var den klare oppmodinga frå han.
Beate Grimsrud ønskte alle ein god festival.
- Det er stor stas og stor ære å få opne den einaste reine dokumentarfilmfestivalen i Noreg, sa ho då ho klipte snora.
- Eg ønskjer alle ei god reise med alle filmane.
