Xbike er ei ny grein som blir arrangert laurdag under X2-festivalen. Foto: Trond Erik Kupen.
Torsdag er det opning av X2-festivalen i Volda. Dystre vêrmeldingar har snudd, oskeskya er på veg vekk, og det meste ligg vel til rette for både arrangørar og deltakarar. Det heile starta først som ein skifestival for fem år sidan, men har blitt utvida med nye idrettar for kvart år. I år tel festivalen heile ni greiner, og brattsykkelkonkurransen Xbike er ein av tre nykomarar.
Xbike blir arrangert for første gong i år, og var tenkt som ei uhøgtidleg samling for sykkelinteresserte. Det heile vil gå som planlagt, men etter litt diskusjonar blir no også Xbike ei ekte konkurranse med tidtaking. Konkurransen finn stad laurdag, og løypa går frå stien ”snauderåsa”, om lag 30 minutters gange frå bommen på vegen opp til Prestesetra i Volda.
Xcreek
Creekpadling tyder på godt norsk bekkepadling. I utgangspunktet skulle denne greina gå føre seg i Rossåa som renn gjennom Ørsta sentrum. Grunna låg vasstand har konkurransen blitt flytta til Bygdeelva som renn like utanfor sentrum av Hellesylt. Dette er nesten ein time å køyre frå Ørsta sentrum, men arrangørane meiner at det aller viktigaste er at konkurransen får gå av stabelen, og forholda i Bygdeelva skal vere gode.
(Artikkelen held fram under bildet)
Xfree og Xtind
På grunn av snøfall førre helg måtte arrangørane gå vekk frå Kvanndalen som konkurransearena, men gode vêrmeldingar gjer Bondalseidet til eit godt alternativ. Selskapet Bergtatt Stryn har godkjent området med god margin, og i tillegg er det eit mykje meir publikumsvennleg område. Det er også her konkurransen har blitt arrangert tidlegare. Fredag er det kvalifisering, og heisane er opne heile dagen for publikum.
Xfree er ein freeride-konkurranse for alpint, snowboard og telemark.
Xtind er ei tindeklatringskonkurranse.
I tillegg til alt dette blir det også konkurranse i regi av Volda-Ørsta Himmelseglarlag på Bondalseidet og på Årneset i Volda. Samt longboard-konkurranse med løype frå Klepp i Volda til sentrum.
Fullstendig program ligg ute på nettstaden www.x2ski.no.
