Den vakre kattugla enda sine dagar på ein veranda i Volda. Ho har truleg døydd av alderdom eller sjukdom, for det var ingen ytre teikn på skade. (foto: Åshild Lauritsen)
Søndag
gjorde Åshild Lauritsen store auge då ho kika ut på altanen. Der låg nemleg ei
daud kattugle!
Dette er
truleg den same ugla som Møre skreiv om førre torsdag. Onsdag i førre veke var
ho observert sitjande på ein gesims på nedsida av Nordea-bygget i Volda
sentrum. Kattugla sat urørleg i timevis, til stor glede for nysgjerrige
forbipasserande. Til slutt forlet ho
staden, og var sist sett flygande i retning kyrkjetårnet. No har ho tydelegvis
takka for seg.
Ikkje
ytre skade
Lauritsen
veit ikkje kor lenge ugla har lege på altanen, sidan der har vore mykje snø.
- Det er ikkje kvar dag vi går ut der, seier ho forklarande. Ho fortel at det ikkje viste nokon ytre teikn på at ugla var skadd. Difor ynskjer Lauritsen å få kattugla utstoppa.
- Det vart ingen begravelse nei, seier ho, og viser til at ugla er forsvarleg nedfryst i påvente av å bli sendt til ein taksidermist.
- Dette er ikkje den mest vanlege fugletypen her på våre kantar, så vi ynskjer å ta vare på den, forklarar ho. Lauritsen seier ho har stor glede av å ha fuglar i nabolaget, og det hender ho har høyrt ugler tute kring huset. Dette er likevel fyrste gongen ho har funne ei kattugle på verandaen.
