Simen Bjørdal skal spele trommesolo under UKM på Volda samfunnshus laurdag. Han har deltatt fleire gongar tidlegare.
Ni kunstnarar og 27 ulike sceneinnslag skal vise Volda kva ungdomen er god for. Ungdomens kulturmønstring går av stabelen laurdag, og i Volda er arrangementet populært som aldri før. UKM-ansvarleg May-Lisbet Lande rosar den blomstrande ungdomskulturen.
- Arrangementet har ei veldig bra oppslutning, og det er stor variasjon både av det vi får sjå på scena og i kva kunstnarane har å vise fram, fortel ho.
- Det er supert med eit slik engasjement.
Heavy Rock og ballader
I følgje Lande har Volda tradisjon for å huse store mønstringar. I fjor deltok 13 kunstnarar med til saman 28 måleri. På scena var det 16 innslag.
- Det er litt færre kunstnarar i år, men desto fleire sceneinnslag.
Til samanlikning hadde UKM i Ørsta i år 12 sceneinnslag og fire kunstnarar då dei heldt UKM 7. februar.
Laurdag får publikum sjå både hip hop dans og lyrisk jazz-dans på scena på samfunnshuset i Volda. Musikken strekk seg frå klassisk og balladeduettar til pop og Heavy Metall og Heavy Rock.
Nokre heldige deltakarar vil kome vidare til fylkesmønstringa som skal i år skal haldast i Haram kommune. Nokre få heldige av dei igjen kan kome vidare, gjennom nålauget til UKM festivalen som vanlegvis går av stabelen i Trondheim. Her samlast om lag 25 deltakarar frå heile landet.
- Det er sjølvsagt eit stort mål for mange av deltakarane, og dei er veldig dyktige her, rosar May-Lisbet Lande
