Rånaren Palle hadde godt drag på publikum.

”Palle”, ”Strila-Petter” og ”Kjellen” – tre likandes karar, feia over Ørsta laurdag. Gullkorna var mange og latteren sat laust då Thomas N. Ryste inviterte til premiere for Klypa 2009 på Rust Club og Scene.

Har du til dømes lurt på korleis Fjord1 klarer å lage nok svelerøre til kiosken, så har Klypa svaret. Kjell ”Kjellen” Bigset, ferjemann og bussjåfør, heldt ein herleg demonstrasjon som inneheldt ein 100 liters stamp og ein påhengsmotor. Det vart rett nok ikkje så mykje svelerøre att som venta…

Ny karakter
I tillegg til ”Kjellen” og rånaren ”Palle”, introduserte Klypa publikum for den trivlege karen ”Strila-Petter”, ein gardbrukar og stålarbeidar med slekt i Hardanger. ”Strila-Petter” fortalde til dømes om gode kjerringråd dersom ein skulle vere så uheldig å møte ein brennmanet. Publikum kunne levande sjå føre seg hendinga, og dei fleste hadde nok eit sterkt håp om at dette aldri måtte hende dei!

”Kjellen” til syden
Sidan førre show har rånaren ”Palle” gått frå gamal Chevy til stor pickup, for å drive meir rasjonell business. Gjennom denne sketsjen fekk Ryste spøke litt med sin eigen permisjon frå forsikringsbransjen. Elles fekk publikum følgje ”Kjellen” på sydentur, ei reise som ikkje gjekk heilt utan forviklingar. Han måtte handskast med både nærgåande tollarar og eit flytoalett utan dopapir.

Mykje song
Showet var svært variert. Ryste veksla leikande lett mellom dei tre ulike karakterane, bunde saman av film på tre storskjermar slik at alle såg godt. Etter ståande applaus drog Klypa-gjengen i gong eit ekstranummer av den musikalske sorten. Song og musikk var nemleg ein stor del av showet, og Ryste imponerte ved å hoppe frå den eine sjangeren til den andre. I ekstranummeret spelte han endåtil saksofon. Med dette er Klypa sin femte sesong i gang, og framsyningar både i Ålesund, Bergen og Oslo ventar.