Ekstremveret søndag førte til at det rømde om lag 40.000 laks frå Aqua Farms Vartdal AS sin lokalitet Bjørndal i Ørsta. Fiskeridirektoratet har gitt løyve for fiske etter den rømde fisken og dermed fiskar folk både frå båt og land på Vartdal.

Laksen har ei snittvekt på 2,2 kg, den er frisk og har ikkje fått påvist noko slags sjukdomar, melder oppdrettselskapet i ei pressemelding.

Innfestinga rauk
Lokaliteten på Bjørndal består av 12 mærer. Det er frå eine av desse det er rømt fisk.
- Uveret med kraftig vind og høge bølger har ført til at innfestingstaua på ei av nøtene truleg har slitna på eine sida. Notveggen på eine sida har då glide ned slik at fisken har klart å kome seg ut. Anlegget er sertifisert, nøyaktig årsaksforhold vil bli forsøkt avdekka i samarbeid med relevante myndigheiter og instansar, seier Aqua Farms Vartdal vidare.

Lov å fiske
Fiskeridirektoratet er varsla om hendinga. Dei har gitt løyve til fiske etter den rømde laksen. Området løyvet gjeld for er Hallefjorden avgrensa vestover til grenselina Larsnes-Åram, Syvdsfjorden, Rovdefjorden, Voldsfjorden, Dalsfjorden, Ørstafjorden, Vartdalsfjorden, Hjørundfjorden, Sulafjorden til en grenselinje Eltraneset - Kvitneset og Storfjorden inn til ei grenseline Skotet-Dyrkorn.

Løyvet gjeld ikkje i fredingssonene i elvemunningane i dette området. Løyvet gjeld handreiskap og garn med nedre maskevidde på 55 millimeter. Villfisk av laks og sjøørret skal setjast ut att.

Direktoratet gjer elles merksam på at i sjøen har grunneigaren einerett til å fiske etter anadrome laksefisk med fastståande bunden reiskap så langt hans grunn går. Rømt oppdrettslaks er å rekne som anadrom laksefisk.

Mottak for fisk
Aqua Farms Vartdal AS har frå og med tysdag etablert mottak for fisk etter gjenfangst.

- Mottaket er ved pakkeriet Western Seaproducts AS sitt anlegg på Vartdal. Folk kan der fylle ut fangstskjema og levere fisk. Aqua Farms Vartdal AS betaler 15 kr pr kg fisk levert, vert det opplyst.