Volda
handelsforeining kan med glede presentere tryllekunstnaren Abbadull i år igjen.
Han var eit populært innslag førre gong han var i bygda.
”Fortryllande
sommardagar i Volda” har handelsstanden kalla dagane frå torsdag til laurdag
denne veka. Det vert aktivitetar for store og små.
Fyrst
ut er ein morosam karaoke-konkurranse på torget i kveld. Konferansierar vert
Stine Ingeborg Reite Dimmen og Ida Glomnes. Dei står for underhaldning mellom
songane og skal dømme konkurransen. Vinnaren vil stikke av med eit gåvekort på
heile 1.000 kroner, som kan nyttast i ein av butikkane som er knytt til Volda
handelsforeining. Det vil òg bli gitt ein ”Best in show”-pris, til ein som
utmerkar seg under si framføring. Vedkommande vinn gåvekort på 500 kroner.
Fredag vil Dagfinn og Rasmus Fløtre spele saxofon og keyboard på Spinneriet, og
det vert sett fram gratis kaffi og kaker. På fredag er det òg høve til å få med
seg tryllekunstnaren Abbadull på torget, der han har rigga seg til med eige
telt. Laurdag har handelsforeininga gitt torget til dansande born. I helga
arrangerer nemleg Sunnmøre frilynde ungdomslag i samarbeid med Volda ungdomslag
Sunnmørsstemna for born, og dei vil gå i bunadstog og danse for voldingane i
sentrum under laurdagshandelen.
