Elevane i 6. og 7. klasse både song og dramatiserte. Kostyma hadde dei laga sjølve.

Tysdag ettermiddag var det framsyning på Bondalen Grendahus. 6. og 7. klasse ved Sæbø Skule framførte teaterstykket Jonas i jungelen. Dei song mange fine songar, og mellom songane spelte dei skodespel.

Stykket Jonas i jungelen handlar om guten Jonas som har astma, og difor får han ikkje lov å ha dyr. Jonas er lei seg, for han vil jo så gjerne ha ein hund. Han ligg og er lei seg i senga si, og plutselig er han midt i ein jungel. Der møter han mange spennande dyr. I jungelen møter Jonas apekatten Alfred, som er redd for å klatre i tre. Men Jonas er fast bestemt på å hjelpe Alfred å lære å klatre.

Framsyninga var flott, med mange fine songar. Kostyma hadde dei laga sjølve, medan kulissene var lånte. Vi fekk møte både elefantar, løver, strutsar, giraffar og mange andre dyr i jungelen. Det var ikkje fullt hus på grendahuset, men det var ein del som hadde tatt turen dit, for å sjå denne forestillinga. Elevane har øvd på dette i lang tid, og dei takka spesielt læraren sin fordi ho har vore så engasjert.

Jonas (t.v.) vart spela av Lisabel Hustad Øvrelid. Stian Jørgensen spelte struts.